منتديات الكفة لقبائل بنى رشيد - هاضت دوافيع القريحة كلمات الشاعر عبدالعزيز نشمي المهيمزي الرشيدي

هاضت دوافيع القريحة كلمات الشاعر عبدالعزيز نشمي المهيمزي الرشيدي

هاضت دوافيع القريحة وابتدا نظم الشعر
والارض تحت اجبالها والدار بااسم ارجالها

سلم على اللي يكسب الطالة وينحت من صخر
الشاردات الكايدات المعجزة عدالها

ماهمّه الموقف كبر ولا على هونه صغر
كلمة نعم عند النشاما من نصيبه نالها

مثل النفيعي سالم اللي لاوقف داس الجمر
سالم زبن حلالها لاعاندتك احبالها

رقيب لكنّه عقيد المجد يقدح من صطر
ماهمته كل المواقف دقها وجلالها

من روس فرسانن لها المعركة العلم وخبر
جمرة عرب يوم المعارك يصطلي خيّالها

اعتيبة الهيلا هل العادات والموت الحمر
برقاء وروق من الحقايق ماتموت افعالها

يرضخ لها التاريخ والعز المطنّا يستقر
والمجد والنوماس والصيت المشرّف فالها

يوم المعارك سيلها دم وخناجرها مطر
اقوالها تثبت براهينا تعد افعالها

فرسانها ماتختصر وفعالها ماتختصر
كسرت جيوش الترك بالتاريخ يبقى جالها

منهم شليويح العطاوي لاضرب فج النحر
لاصاح فوق الخيل موّت عنفوان اقبالها

ومسلط وبن هندي وضيف الله وهذال وعمر
كم من عجوزا من فعايلهم تصيح اعيالها

وتركي حميد وناصر الشغار والضيط وبدر
يردون حوض الكايدة ويعانقون ازلالها

ومناحي الهيضل وابن حجنة ليا اشد الامر
ساقوا خصايمهم مثل سوق النضاء بحبالها

وابن خثيلة والعليثة من فعل ولّا فخر
وسرور ابن غنام ومحمد وباق ابطالها

والداهية فاجر وابن دبشي مثل نور القمر
وابا العلا ومقعد ليا حان اللقاء معدالها

وعفّاس خيّال المهار الكايد بعيد النظر
يرعى ديار الخوف وابله مااهتنى من جالها

وابن بجاد وشالح وسلطان عنوان الخطر
وابن عميرة كايد الغارة شرب فنجالها

وشقير ودغيلب وابن مروي مقابيس الضفر
وابن زريبة حامي الهيّة ومرو اسلالها

وناصر ولد رازن وسيف الضان خيّال الشقر
عدمين نكدين المواجه ماتموت امثالها

وزايد حريميس ان كسر عظم المعادي ماجبر
وابو عبية لاألتحم صف الرمك غنّالها

وابن نجم كسّاب جزلات المواقف والعفر
كم غزوتن تشبع ضوار الحزم من سربالها

وابن تنيبيك المعرّب قاصر آجال العمر
يضرب على روس العدى ويشيل روس ارجالها

ومقذل ومزيد متعبين الخيل وافين الشبر
وابو خشيم اليا اعتزى روس الاكابر طالها

ومتنبي عتيبة قصيده بالحكم غبة بحر
تاريخ جزلات القصايد ينتهض موالها

وضاوي عقيد الجيش زبن اللي لعب فيه الفقر
وشيوخها بالمجد تارثها بعدها اشبالها

خاضوا معارك راهية واقفوا برايات النصر
فرسان برقاء وروق يبقى بالمقام احوالها

قلته وانا من عبس عنوان المهابة والفخر
روس الدهاةللي بوقت اللازمة يلجالها

الشاعر عبدالعزيز نشمي الرشيدي

[youtube]http://www.youtube.com/watch?v=BnB2fIIRFaY[/youtube]